Kva skjer med arbeidsretta rehabilitering?
Framtida til eit svært viktig fagfelt står på spel. No er det avgjerande at politikk blir til handling, skriv AiR-direktør Tarjei Urup Helle.
AiR leverer i dag arbeidsretta rehabilitering basert på avtalar med Helse Sør-Øst. Dette er avtalar me har fått etter opne anbodskonkurransar.
Alle avtalane med private og ideelle leverandørar som leverer spesialiserte rehabiliteringstenester til HSØ er sagt opp med verknad frå 1. januar 2026.
Dette er heilt etter planen, og det er sett i gang ein ny anskaffingsprosess.
Helse Sør-Øst kom på same tid med ei behovsvurdering innan fysikalsk medisin og rehabilitering for neste anskaffingsperiode. I den vart det varsla ei styrking av rehabilitering i dei fyrste fasane etter ei sjukehusinnlegging.
Det er vel og bra, men diverre ser det ut til at helseføretaket ikkje har den same omsuta for pasientar med langvarig slitasje, som over tid får så låg helsefunksjon at dei vert henvist frå primærhelsetenesta til spesialisthelsetenesta.
Desse pasientane må bu seg på å få tilbod med lågare intensitet og kortare opphald.
HSØ har i behovsvurderinga heller ikkje funne plass til ei eiga delyting med arbeid som mål.
Dette strir med helse– og samhandlingsplanen, som understrekar regjeringas ynskje om å «styrke arbeidsretta rehabilitering».
«Diverre ser det ut til at helseføretaket ikkje har den same omsuta for pasientar med langvarig slitasje.»
Behovet for tiltak som skal styrke helsefunksjon med arbeid som mål må sjåast i samanheng med andre tendensar i samfunnet som:
- Veksten i utbetalingar i sjukepengar har auka med 16% berre sidan i fjor.
- Pensjonsforliket krev at arbeidstakarar skal stå lenger i arbeid, og mange vil trenge tiltak for at helsa skal tole det.
- Det er store bemanningsutfordringar i kritiske sektorar med høg grad av sjukefråvær, slik som helse, omsorg og oppvekst.
- Over 100 000 unge vaksne er utanfor arbeid eller utdanning – mange på grunn av helseutfordringar.
«Me opplever at Regjeringa og Stortinget anerkjenner at arbeidsretta rehabilitering er
eit viktig verktøy.»
Arbeidsretta rehabilitering er eit verktøy som kan bidra til å løyse desse samfunnsutfordringane.
Døgnbasert arbeidsretta rehabilitering (ARR) er effektivt og har vist seg samfunnsøkonomisk lønsamt etter berre to år.
Me opplever at Regjeringa og Stortinget anerkjenner at arbeidsretta rehabilitering er eit viktig verktøy for å sikre at så mange som råd har moglegheit til å bidra med sin kompetanse inn i arbeidslivet.
Det avgjerande no er at politikk blir til handling. Det er eit ansvar både helseføretaka og Regjeringa må ta.
Eit anna ord for handling er anskaffing.
Det endelege svaret for framtida til arbeidsretta rehabilitering får me når HSØ offentleggjer konkurransegrunnlaget for den neste anskaffinga for spesialisert rehabilitering i spesialisthelsetenesta.
Tarjei Urup Helle
Direktør, Rehabiliteringssenteret AiR
