Endeleg: Politiske signal vert konkretisert
I dag kom det tydeleg beskjed frå våre folkevalde om at tilbodet AiR leverer, er viktig for landet vårt.
I forrige nyheitsbrev spurte eg retorisk kva som skjer med arbeidsretta rehabilitering.
No har eg fått svar.
Eit fleirtal i Helse- og omsorgskomiteen på Stortinget er krystallklare på at dei ønskjer å satse på arbeidsretta rehabilitering (ARR) i spesialisthelsetenesta.
Det kjem fram av innstillinga til Nasjonal helse- og samhandlingsplan, kor det mellom anna står:
«… medlemmene frå Arbeidarpartiet, Senterpartiet, Sosialistisk Venstreparti, Raudt og Pasientfokus, meiner eit sentralt mål må vera å byggja ein samla kompetanse i offentleg / ideell regi for å gi fleire nordmenn funksjonsfriske liv. Fleirtalet meiner at arbeidsretta rehabilitering skal vera ein eigen kategori og inngå i tilbodet med tilstrekkeleg plassar med overnatting.»
Eg er svært glad for at desse partia no knyter dei politiske ambisjonane sine til konkrete tiltak
Eg merkar meg at det er konsensus i heile Stortinget om viktigheita av vårt tilbod.
Alle partiene i Helse- og omsorgskomiteen har understreka det, gjennom forslag eller merknader.
Arbeidsretta rehabilitering er ein av få helseintervensjonar som gjennomgåande har arbeid som mål. Det er difor særs gledeleg at landets helsepolitikarar med dette anerkjenner denne typen tilbod som eit viktig verktøy i ein velfungerande velferdsstat.
Det vitnar om godt politisk overblikk.
Pasientane og fagmiljøa i fokus
Det viktigaste er likevel at dette sikrar tusenvis av pasientar denne viktige rehabiliteringa.
Mange av dei er på eit krevjande tidspunkt i livet, med samansatte helseutfordringar, men framleis med motivasjon til å kome attande til arbeidslivet.
Dagens politiske handling kan også sikre at fagmiljøa knytt til private og ideelle aktørar har moglegheit til å bestå. Desse fagmiljøa ein viktig del av fundamentet til ei vidare satsing på fagfeltet arbeid og helse og kommunal arbeidsretta rehabilitering.
Fagmiljøa er klare til å vidareutvikle seg for å møte behova i samfunnet.
Tarjei Urup Helle
Direktør, Rehabiliteringssenteret AiR
